ពំនុះ​ទ្រូង ភ្ញាក់​ផ្អើល


ខ្ញុំ​មិន​ដឹង​ថា​មាន​ពំនុះ​ទ្រូង​កាត់​តាម​បណ្ដោយ​ផ្លូវ​ថ្មី​សោះ ព្រោះ​ធ្លាប់​តែ​ឃើញ​មាន​ពំនុះ​ទ្រង់​តាមបណ្ដោយ​វិថី​នានា​ក្នុង​ទី​ក្រុង​ភ្នំពេញ​ដែល​ធ្វើ​ពី​ស៊ី​ម៉ង់ត៍ លាប​ពណ៌​លឿង​ខ្មៅ ដាក់​តាម​បណ្ដោយ​ផ្លូវ​នា​នា ដើម្បី​កាត់​បន្ថយ​នូវ​ការ​ស្ទះ​ចរាចរណ៍ នៅ​ក្នុង​ទី​ក្រុង។

នេះ​ជា​រូប​ភាព​ដែល​មាន​ពំនុះ​ទ្រូង​​ដែល​ធ្វើ​ពី​ស៊ី​ម៉ងត៍ លាប​ថ្នាំ​ពណ៍​លឿង និង​ខ្មៅ! តែ​អ្វី​ដែល​ចាប់​អារម្មណ៍​ជាង​នោះ​គឺ​ម៉ូតូ​ទាំង២​នោះ កំពុង​តែ​ជិះ​ខុស​ច្បាប់ហើយ!!​កិកិកិ មិន​នឹក​ស្មាន​សោះ! បើ​ម្ចាស់​រូប​ថត​ឃើញ​រូប​នេះ​សូម​កុំ​ថា​ខ្ញុំ​ជា​អ្នក​ថត​អី ព្រោះ​ខ្ញុំ​យក​មក​ពី​ការ​ស្វែង​រក​នៅ​ក្នុង​ហ្គូហ្គល​ទេ! កិកិកិ សុំទៅចុះណាង៉ៃ​ក្រោយៗ​កុំ​ជិះ​ចឹង​ទៀត ខ្លាច​ប៉ូលីស​ផាកអស់​គូថ​ខោ​ទៀត។

នេះ​ជា​រូប​ភាព​នៃ​ពំនុះ​ទ្រូង​ថ្មី​ដែល​សាលា​ក្រុងទើប​តែដាក់​នៅ​តាម​បណ្ដោយ​ផ្លូវ​ព្រះសីហនុ ចាប់​ពី​ស្តុប​ផ្លូវ​មុនីវង្ស​​ទៅ​តាម​បណ្ដោយ​ផ្លូវ​ព្រះសីហនុ រហូត​ដល់ចុង​សួន​ខាង​លិខ​វិមាន​ឯករាជ្យ។ ខ្ញុំ​ភ្ញាក់​ផ្អើល​តិច​ដែរ​ដោយ​ឃើញ​របាំង​ថ្មី​ដែល​ធ្វើ​ពី​ដែក លាប​ពណ៌​ខ្មៅ​ដដែល​ ហើយ​មាន​លាយ​ពណ៌​លឿង​ខ្លះ​ៗ។ តែ​ខ្ញុំ​ឃើញ​មាន​តែ​មួយ​កំណាត់​ផ្លូវ​នេះ​ទេ មិន​ទាន​បាន់​ឃើញ​នៅ​ទី​ណា​ទៀត​ឡើយ ប្រសិន​បើ​បងប្អូន​ដឹង​សូម​ប្រាប់​ផង ព្រោះ​ឃើញ​ថា សាលា​ក្រុង​យើង​យក​ចិត្ត​ទុក​ដាក់​នឹង​ចរាចរណ៌​នេះ​ណាស់ ដើម្បី​កាត់​បន្ថយ​ការ​កក​ស្ទះ តាម​ដង​ផ្លូវ។ វា​ល្អ​សំរាប់​ចរាចរណ៌​តាម​រថ​យន្ត តែ​ពិបាក​សំរាប់​អ្នក​ថ្មើ​រ​ជើង​ដែល​ត្រូវឆ្លង​ថ្នល់ ព្រោះ​ត្រូវ​ទៅ​រហូត​ដល់​សួន​ជិត​វិមានឯករាជ ឬ​ដល់​ស្តុប​ផ្លូវ​ត្រសក់​ផ្អែម ឬ​ស្តុប​ផ្លូវ​មនុវង្ស។

ខ្ញុំ​មិន​ដឹង​ថា សាលា​ក្រុង​នឹង​មាន​គំរោង​ធ្វើ​ផ្លូវ​ដើរ​កាត់ ទទឹង​ថ្នល់​ដូច​នៅ​សឹង្ហបុរី, ថៃ, មាឡេស៊ី និង ឥណ្ឌូនេស៊ី​ ឬអត់​ទេ!

សួស្ដី​ណូអែល និង​រីករាយឆ្នាំ​ថ្មី​២០១១


សួស្ដី​ណូអែល​បងប្អូន​ប្រុស​ស្រី សូម​ជូន​ពរជ័យ​ដល់​គ្រប់ៗ​គ្នា
ជួប​តែ​ក្ដី​សុខ​កុំ​បី​ឃ្លាត​ឃ្លា គ្រប់ប្រាណ​អង្គា​សុខភាពប្រពៃ។

សូមអោយ​​គ្រួសារ​បាន​សុខ​ក្សេម​ក្សាន្ត  កិច្ច​ការ​អ្នក​បាន​ជោក​ជ័យ​គ្រប់​ពេល
ឡើង​បុណ្យ​ឡើង​សក្ដិ​ប្រាក់​ខែឡើង​ទ្វេរ  ឡើង​ធ្វើ​ជា​មេ​ជា​manager។

ឯការ​សិក្សា​អ្នក​បាន​សម្រេច  រៀន​ចាំ​មិន​ភ្លេច​ចំណេះ​ពេញ​ខ្លួន
បាន​ដល់​ទី​ត្រើយ​​ត្រេក​អរនឹម​នួន ជូន​ដល់​បងប្អូន​ក្នុង​ថ្ងៃ​ដ៏​ល្អ។

សូមអញ្ជើញ​ចូលរួម​ថ្ងៃ​ណូអែល


នៅ​កន្លែង​ខ្ញុំ​មាន​រៀប​ចំ​កម្ម​វិធី​ណូអែល ដែល​គ្រប់​គ្នា​ភាគ​ច្រើន​ស្គាល់​ នឹង​ដឹង​យ់ាង​ច្បាស់​ថា​នៅ​ថ្ងៃ​ទី​២៥ ខែ​ធ្នូ ជា​ថ្ងៃ​បុណ្យ​គ្រីស្ត​ម៉ាស់​មួយ​ដ៏​ធំ​នៅ​ជុំ​វិញ​ពិភព​លោក។ ចឹង​ពួក​ខ្ញុំ​ដែល​ជា​គ្រិស្ត​បរិស័ទ នៅ​ស្រុក​ខ្មែរ​នេះ ក៏​បាន​រៀប​ចំ​អប​អរ​សាទរ​ថ្ងៃ​ណូអែល ដែរ។

នៅ​ថ្ងៃ​ទី ២៥ ខែ​ធ្នូ ឆ្នាំ​២០១០ យើង​ខ្ញុំ​បាន​រៀប​ចំ​កម្ម​វិធី​ណូអែល​សំរាប់​យុវជន ហើយ​កម្ម​វិធី​នេះ​នឹង​ប្រព្រឹត្ត​ទៅ​វេលាម៉ោង ៤៖០០-៧៖០០ យប់ នៅ​ទី​ក្រុង​កោះ​ពេជ្រ អាគារ B.

មាន​កម្ម​វិធី​សប្បាយ​ៗ​ជា​ច្រើន ដែល​រៀប​ចំ​ជូន ព្រម​ជាមួយ​នឹង​រង្វាន់​ដែល​បាន​ទទួល​ការ​ឧបត្ថម្ភ​ពី​បណ្ដារ​អង្គ​ការ ក្រុម​ហ៊ុន និង​កន្លែង​ផ្សេងៗ​ទៀត​ជា​ច្រើន​ផង​ដែរ។

ជាមួយ​នោះ​ផង​ដែរ​ក៏​នឹង​បាន​រីក​រាយ​ជាមួយ​ក្រុម​តន្ត្រី​របស់​ខ្ញុំ​ផ្ទាល់​ ដែល​ពួក​កាត់​សុទ្ធ​សឹង​តែ​ជា​យុវជន​គ្រិស្ត​បរិស័ទ ដែល​មាន​សមត្ថ​ភាព​​ក្នុង​ការ​លេងតន្ត្រី​ផង​ដែរ។

សូម​កុំ​ភ្លេច​ចូល​រួម​អោយ​បាន​ច្រើន​ណា ព្រោះ​មិន​ចាំ​បាច់​មាន​សំបុត្រ​ទេ គឺ​ចូល​រួម​បាន​គ្រប់​ៗ​គ្នា និង​ដោយ​សេរី! កុំ​ភ្លេច​ជួប​គ្នា​នៅ​ទី​ក្រុង​កោះ​ពេជ្រ អាគារ B វេលា​ម៉ោង ៤៖០០​ល្ងាច នា​ថ្ងៃ​ទី​២៥ ខែ​ធ្នូ។ ខ្ញុំ​នៅ​ទី​នោះ​រង់​ចាំ​គ្រប់​ៗ​គ្នា!

សុខ​សប្បាយ​ឬ​ទេ?


ជំរាប​សួរ​បងប្អូន​អ្នក​ភូមិ​អើយ!!! អាឡុវ​នេះ​ឃើញ​ថា​ភូមិ​យើង​ដូច​ស្ងាត់​ដល់​ហើយ មិន​សូម​មាន​រឿង​រំជើប​រំជួល​អី​កើត​ឡើង​ទេ មើល​ទៅ​បងប្អូន​យើង​រវល់​តែ​ច្រូត​កាត់​ហើយ​ ព្រោះ​អី​ពេល​ខ្លះ​មិន​សូវ​ឃើញ​នៅ​ផ្ទះ​សោះ បើក​ទ្វារ​ចោល ទៅ​ស្រែ​ចម្ការ​បាត់។

និយាយ​ ខ្ញុំ​ហ្នឹង​ក៏​រវល់​ដែរ មិន​សូវ​មាន​ពេល​មក​អឺត​ផ្ទះ​សោះ តែ​ឃើញ​តែ​ក្រដាស់​សំបុត្រ​ សារ​ទុក​ប្រាប់​ថា មាន​បងប្អូន​យើង​មក​ ខ្ចី​ប៊ីចេង ប្រហុក ខ្ទឹម យក​ទៅ​ប្រើ! តែ​មិន​អី​ទេ យក​ទៅ​ព្រោះ​ខ្ញុំ​មាន​ច្រើន​ណាស់ ទិញ​ស្តុក​ទុក ខ្លាច​ក្រែង​មាន​គ្រោះ​អាសន្ន​កើត​ឡើង!!

សូម​ជំរាប​សួរ​ និង​ផ្ដល់​ក្ដី​នឹក​រលឹក​ដល់​បងប្អូន​អ្នក​ភូមិ​វ៉ើត​ប្រេស​នេះ​ផង!

ទៅ​បោះ​ជំរំ​នៅ​គិរី​រម្យ


នៅ​ថ្ងៃ​បុណ្យ​អ៊ុំ​ទូក អក​អំបុក និង​សំពះ​លោក​ខែ ខាង​មុខ​នេះ នឹង​មាន​មនុស្ស​ជាង​២លាន​នាក់​ នឹង​សំរុក​មក​ទី​ក្រុង​ភ្នំពេញ នោះ​ទី​ក្រុង​ភ្នំ​ពេញ នឹង​មាន​សភាព​អ៊ូ​អរ​ខ្លាំង​ណាស់! ដោយ​មិន​ចង់​នៅ​ភ្នំពេញ​ក្នុង​កំឡុង​ពេល​នោះ ខ្ញុំ​និង​ក្រុម​ការងារ​មួយ​ចំនួន​សម្រេច​ចិត្ត​ថា នឹង​ទៅ​បោះ​តង់ បោះ​ជំរំ នៅ​សួន​ឧទ្យាន​ជាតិ​គិរីរម្យ​វិញ។

គ្នា​ខ្ញុំ​ប្រមាណ​ ជិត​៣០នាក់ នឹង​ទៅ​បោះ​តង់​នៅ​ក្នុង​ព្រៃ​គិរី​រម្យ​ក្នុង​រយះ​ពេល​៣​ថ្ងៃ ហើយ​យើង​នឹង​ចំណាយ​ពេល​សប្បាយ​ជាមួយ​គ្នា និង​ផ្សង​ព្រេង​ ជាមួយ​គ្នា​ក្នុង​ព្រៃ​នោះ!!  តើ​មាន​អ្នក​ធ្លាប់​ធ្វើ​ដូច​ពួក​យើង​ទេ ? យើង​ធ្លាប់​បាន​ធ្វើ​ការ​បោះ​ជំរំ​នោះ ២​ដង​រួច​មក​ហើយ​កាល​ពី​ឆ្នាំ ២០០៧ និង ២០០៨។ សប្បាយ​ណាស់ ប្លែក ហើយ​មាន​អារម្មណ៍​ថា បទ​ពិសោធន៌​ថ្មី​នៃ​ការ​ រស់​នៅ ការ​ហូប​ចុក និង​ការ​សប្បាយ។ យើង​នឹង​រៀប​ចំអាហារ​សំរាប់​ពេល​៣​ថ្ងៃ ប្រើ​ប្រាស់​បង្គន់ ធម្ម​ជាតិ និង ផ្សង​ព្រេង​ក្នុង​ព្រៃ។

សូម​ប្រាប់​ថា​ សប្បាយ​ម្យ៉ាង​ដែរ!!! យើង​មិន​បាន​ភ័យ​ខ្លាច​ទេ ទោះ​ក្នុង​ព្រៃ​នោះ​មាន​សត្វ​ក៏​ដោយ!!! កិកិកិ ចង់​ទៅ​អត់?

បាត់​មុខ


សួស្ដី និង​សុខ​សប្បាយ​ទេ​បងប្អូន? មួយ​រយះនេះ ខ្ញុំ​មិនសូវ​បាន​ចុះ​​ផ្សាយ​អត្ថ​បទ​អ្វី​នៅ​លើ​វ៉ើត​ប្រេស​ទេ ហើយ​ក៏​មាន​អារម្មណ៌​ថា ដូច​អត់​មាន​អី​និយាយ​ចឹង។ ចុះ​បាត់​សម្ដី​ និង​វោហា​សព្ទ័​ទៅ​ណា​អស់​ទៅ? នេះ​ប្រហែល​ជា​រវល់​ពេក​ហើយ។ នឹក​បងប្អូន​យើង​ដល់​ហើយ!!!

បាត់​មុខ​មិន​សូវ​និយាយ​ស្ដី​អី​នៅ​លើ​វ៉ើត​ប្រេស​មែន តែ ក៏​ឆ្លៀត​ចូល​ទៅ​លេង​ផ្ទះ​បងប្អូន​មួយ​ចំនួន​ដើម្បី​មើល​តើ​គាត់​មាន​អ្វី​ចែក​រំលែក​ខ្លះ។ ឃើញ​ថា​មិន​សូវ​មាន​អ្វី​ដែល​គួរ​អោយ​ចាប់​អារម្មណ៌​សោះ ក្នុង​កំឡុង​ពេល​ប៉ុន្មាន​សប្ដាហ៌​នោះ និយាយ​តែ​រឿង​ដែល​ ខ្ញុំ​អត់​សូវ​ចង់​ដឹង! កិកិកិ។ តែ​អ្វី​ដែល​ខ្ញុំ​សង្គេត​ឃើញ​នោះ​ក៏​ដឹង​ថា មាន​បងប្អូន​អ្នក​ភូមិ​យើង​មួយ​ចំនួន​បាន​បាត់​ខ្លួន​ពី​ភូមិ​ដែល ហាក់​ដូច​ជា​ស្ងាត់​ច្រៀប​ អត់​មាន​អ្វី​កើត​ឡើង​ចំពោះ​ជីវិត​គាត់​សោះ!!! តើ​មាន​រឿង​អ្វី​កើត​ឡើង​ទៅ? ទៅ​ណា​អស់​ហើយ? ជីវិត​របស់​បងប្អូន​អ្នក​ភូមិ​យើង​សុខ​ទុក្ខ​យ៉ាង​ណា​ដែរ?

មាន​-ត្រប់ ឬ មាន-ទ្រព្យ


តាម​ប្រពៃ​ណី​ខ្មែរ​យើង នៅ​ក្នុង​ការ​រៀប​អាពាហ៌ពិពាហ៌​​មាន​ការ​រៀប​ចំ​ជា​ច្រើន​បែប​ច្រើន​យ៉ាង​ទៅ​តាមប្រ​ពៃ​ណី​របស់​ប្រជា​ជន​ខ្មែរ​យើង។ នៅ​ក្នុង​នោះ​មាន​​ទម្លាប់​មួយ​ដែល​គេ​​តែង​តែ​ធ្វើ​ ហើយ​មិន​អាច​រំលង​បាន​គឺ ពិធី​ហែរ​ជំនូន​ ដែល​កូន​កម្លោះ​ត្រូវ​ហែរ​ជំនូន​មាន​ជា​ផ្លែ​ឈើ​ នំ​ចំណី បន្លែ សាច់ និង​ភេសជ្ជះ និង​រណ្ដាប់​ជា​ច្រើន​ទៀត​ទៅ​គេហដ្ឋាន​ខាង​ស្រី​ ដើម្បី​ស្ដី​ដណ្ដឹង​ និង​សុំ​ផ្លូវ​ដើរ​ជណ្ដើរ​ឡើង ដោយ​មាន​មេបារ​ខាង​ប្រុស​ ខាង​ស្រី​ជា​អ្នក​ដែល​សាសង ពាក្យ​សព្ទ័​ ក្នុង​ការ​ស្ដី​ដណ្ដឹង។ តាម​ការ​សង្គេត​ឃើញ​ថា​នៅ​ក្នុង​ជំនូន​ផ្លែ មាន​ផ្លែ​ឈើ និង​រណ្ដាប់​ជា​ច្រើន​ទៀត​ដែល​យក​មក​ជូន តែ​ខ្ញុំ​សូម​លើក​និយាយ​បន្តិច​ចុះ​ពី​រឿង​ផ្លែ​ឈើ។
មិន​ដឹង​ជា​​វា​កើត​ឡើង​តាំង​ពី​ពេល​ណា​មក​ ដែល​គេ​យក​ផ្លែ​មៀន លាយ​ជាមួយ​និង​ផ្លែ​ត្រប់មូល ហើយ​គេ​ចាត់​ទុក​ជំនូន​នោះ​ជា​ជំនូន​បែប​ផ្លែ​ឈើ​ដែរ ដោយ​មាន​ការ​លាយ​គ្នា​ជា​ ផ្លែ​ឈើ​ លាយ​បន្លែរ។ ដល់​ពេល​ខ្ញុំ​សួរ​គេ​ទៅ​ថា ហេតុ​អ្វី​ត្រូវ​លាយ​គ្នា គេ​ថា ដោយ​សារ​តែ​ផ្លែ​មៀន ស្មើរ​និង​ពាក្យ មាន រី​ឯ​ត្រប់​ស្រដៀង​និង​ពាក្យ​ ទ្រព្យ ចឹង​ហើយ​គេ​ចាត់​ទុក​ថា ជា​ជំនូន​សំណាង ដែល​គេ​ដាក់​ទៅ​ដើម្បី​អោយ​ មាន​ទ្រព្យ ហូរ​ហៀរ​នៅ​ក្នុង​ផ្ទះ!!! វា​ដូច​​ជា​ហួស​ហេតុ​បន្តិច​ក្នុង​ការ​ដែល​រៀបចំ​មក​នេះ ព្រោះ តាំង​ពី​ដើម​មក​ មិន​ដែល​មាន​ការ​រៀប​ចំជំនូន​បែប​នេះ​ទេ ឬ​មួយ​មាន​ តែ​ខ្ញុំ​មិន​បាន​ដឹង តែ​សំរាប់​ខ្ញុំ​វា​ដូច​ជា​ហួស​ហេតុ​បន្តិច។ ជំនឿ​បែប​នេះ វា​គ្រាន់​តែ​ជា​ការ​រៀប​ចំរបស់​អ្នក​រៀប​ជំនូន​ប៉ុណ្ណោះ ហើយ​ក៏​ធ្វើ​តាម​តៗ​គ្នា​កន្លង​មក​ ដោយ​គិត​ថា វា​នឹង​មាន​ទ្រព្យ ដូច​ជា​អ្វី​ដែល​គេ​ដាក់​មៀន​ត្រប់! កិកិកិ

មាន​អ្នក​ខ្លះ​ដែល​គាត់​រៀប​ការ​ហើយ តែមិន​បាន​មា​ន​ទ្រព្យ ដូច​ជា​ជំនូន​ដែល​គេ​រៀប​មក​សោះ នោះ​ជា​ការ​កុហក់​ទាំង​ស្រុង!!! ចឹង​ធ្វើ​អ្វី​ៗ​ សូម​ពិចារណា​ផង កុំ​ចេះ​តែ​ធ្វើ​តាម​គេ ហើយ​ឃើញ​ដំរី​ជុះ ក៏​ជុះ​តាម​ដំរី យ៉ាប់​ណាស់!!! បើ​គួរ​ពុំ​គួរ​សូម​អភ័យ!!!!

មុខ​ហើម!


ថ្ងៃ​នេះ​បន្ទាប់​ពី​ជ្រុល​ម៉ោង​ងើប​ទៅ​ធ្វើ​ការ ដោយ​ព្រោះ​តែ​ដេក​យូរ​ពេក​ធ្វើ​អោយ ខ្ញុំ​ងើប​ឡើង​មក​ មុខ​ហើម ប៉ោង​ដូច​សុវិចិត្រ (អាចូច) ចឹង! កិកិកិ! អាឡូវ​ជិះ​មក​ធ្វើ​ការ​តាម​ផ្លូវ​ឃើញ​គេ​លក់​នំ​ច្រើន​ប្រភេទ ចឹង​ក៏​ទិញ​នំ​មួយ​ប្រភេទ​មក​ញ៉ាំ ដើម្បី​ជា​អាហារ​ពេល​ព្រឹក​របស់​ញ៉ុម។ ប្រហែល​ជា​អ្នក​មួយ​ចំនួន​នៅ​ភូមិ​នេះស្គាល់ ហើយ​អ្នក​ខ្លះ​ក៏​មិន​ស្គាល់​ឈ្មោះ​នំ​នេះ​ផង​ក៏​មិន​ដឹង។ តែ​បើ​ស្គាល់​ក៏​សូម​សរសើរ​ព្រោះ​នៅ​ចាំ​ឈ្មោះ​របស់​នំ​ខ្មែរ ដោយ​មិន​ភ្លេច ដោយ​ព្រោះ​តែ​មាន​នំ​បរទេស​មក​ច្រើន​ដូចជា នំ​ដូណាត់ ឬនំប៉័ង​ផ្អែម​ច្រើន​ប្រភេទ​ផ្សេងៗ​ទៀត។

សំរាប់​អ្នក​ដែល​មិន​ស្គាល់​នំនេះ​វិញ គឺ​សូម​ប្រាប់​ថា​ នំ​នេះធ្វើ​ពី​ម្សៅ​ដំណើប ជាមួយ​និង​ស្គ​ត្នោត។ របៀប​ដែល​ចំអិន​គឺ​ ដាក់​ម្សៅ​ដែល​លាយ​រួច​ចូល​ក្នុង​កូន​កែវ​តូច ឬ​ចាន​តូច ហើយ​ចាក់​ចូល​ទៅ​ក្នុង​ខ្ទះ​ដែល​មាន​ប្រេង​ក្ដៅ​ខ្លាំង។ ពេល​ដែល​ចាក់​ចូល​ទៅ​វា​បន្លឺ​សំលេង ចុរ…. ចឹង​គេ​ហៅ​ថា​ នំ​ចាក់ចុរ… ឬ ចាក់​ចូល។

ប្រសិន​បើមាន​បងប្អូន​ណា​ដឹងច្បាស់​ ពី​ប្រវត្ត​របស់​នំ​នេះ​ច្បាស់​ជាង​ខ្ញុំ​សូម​ជួយ​បន្ថែម​ផង ដើម្បី​អោយ​បងប្អូន​ផ្សេង​ទៀត​បាន​ស្គាល់​ផង។

វិធី​បំបាត់​ជំងឺ​ផ្ដាសាយ​ និង​បង្ការ​ចម្លង


រដូវ​ភ្លៀង​ មិន​ទៀង​ទាត់​ទេ ហើយ​អាកាស​ធាតុ​ក៏​ប្រែ​ប្រួល​ដែរ​ ចឹង​រាង​កាយ​របស់​យើង​ក៏​មិន​អាច​ប្រែ​ប្រួល​លឿន​ទៅ​តាម​អាកាស​ធាតុ​នេះ​ដែរ ចឹង​ហើយ​បណ្ដាល​អោយ​យើង​អាច​មាន​ជំងឺ​ផ្ដា​សាយ​បាន។ ចឹង​តើ​មាន​វិធី​បំបាត់​ជំងឺ​ផ្ដាសាយ​ណា​ដែល​ល្អ​ទេ? ជំងឺ​ផ្ដាសាយ​ជាវីរុស​ដែល​អាច​ឆ្លង​​បាន​ ចឹង​ហើយ​អ្នក​ដែល​កើត​ជំងឺ​ផ្ដាសាយ​ត្រូវ​ប្រើ​វិធី​បំបាត់​ និង​បង្ការ​ដូច​ត​ទៅ​នេះ

វិធី​បង្ការ

  1. ប្រើ​ម៉ាស់​បិទ​មាត់ កុំ​អោយ​ឆ្លង​ទៅ​គេ​ទៀត (កុំ​ធ្វើ​ជា​ពួក​ចិត្ត​អាក្រក់​ដើរ​ចម្លង​ដល់​គេ) កិកិកិ
  2. តម​ជួប​មិត្ត​ស្រី! (បើ​ស្រឡាញ់​គាត់​កុំ​ចម្លង​ដល់​គាត់) កិកិកិ
  3. បើ​ក្រដាស និង​ហៀរ​សំបោរ​ ត្រូវ​ប្រើ​ឧបករណ៌​បឺត​សំបោរ ព្រោះ​បើ​ប្រើ​ដៃ ជួន​កាល​ភ្លេច​លាង​ដៃ​មក​ប៉ះ​គេ​ប៉ះឯង​ឆ្លង​ទៀត
  4. បើ​ជា​រៀប​ការ​ហើយ ពិត​ណាស់​ច្បាស់​ជា​ដេក​ក្រៅ​មុង​ហើយ ព្រោះ​ប្ដី ឬ​ ភរិយា​របស់​យើង​មិន​ចង់​ឆ្លង​ពី​យើង​ទេ!
  5. ត្រូវ​តមដើរ​លេង និង​ ជួប​ជុំ​មិត្ត​ភក្ដិ!
  6. តម​ ហ្វេសប៊ុក និង​ វ៉ើត​ប្រេស ព្រោះ​អស់​កម្លាំង​​ណាស់ កុំ​ខំ​អង្គុយ​ពេក

វិធី​បំបាត់

  1. ត្រូវ​តម​ទឹក​កក និង​បរិភោគ​ទឹក​ឧណ្ណៗ​អោយ​បាន​ញឹក​ញាប់
  2. សំរាក​អោយ​បាន​ច្រើន
  3. ទទួល​ទាន​ទឹក​ខ្ញី ជាមួយ​ទឹក​ក្ដៅ​ឧណ្ណៗ
  4. ត្រាំ​ជើង​ជាមួយ​ទឹក​ក្ដៅ​ឧណ្ណៗ
  5. ទទួល​ទាន​ទឹក​ក្រូច​ ឬ​ទឹក​ផ្លែ​ឈើ ដែល​សំបូរដោយ​វីតាមីន ស៊ី

នេះ​គ្រាន់​តែ​ជា​បទ​ពិសោធន៌​ផ្ទាល់​ខ្លួន​ប៉ុណ្ណោះ!

ចូល​​ភូមិ​វិញ​ហើយ!


សួ​ស្ដី និង ជំរាប​សួរ​អ្នក​ទាំង​អស់​គ្នា! ញ៉ុម​បាត់​មុខ​ម៉ា​អាទិត្យ​ពី​ភូមិ ព្រោះ​ជាប់​រវល់​ចេញ​ទៅ​បំពេញ​បេសកកម្ម​នៅ​តាម​ខេត្ត និង​រវល់​ក្នុង​កិច្ច​ការ​របស់​ខ្ញុំ! បាត់​មុខ​ម៉ា​អាទិត្យ នឹក​ដល់​បងប្អូន​អ្នក​ភូមិ​យើង​ដល់​ហើយ! ហើយ​ក៏​ឃើញ​ថាមាន​អ្នក​ចំណូល​ថ្មី​មក​សួរ​សុខ​ទុក​ដល់​ផ្ទះ តែ​អត់​មាន​ម្ចាស់​នៅ! សូម​ទោស​ផង​ទៅ​ចុះ​ណា! ហើយ​ក៏​អរគុណ​ដល់​មិត្ត​ភក្ដិ​ចាស់​ៗ​មក​លេង​ដែរ យ៉ាង​ហោច​ណាស់​ក៏​មក​អើត​សួ​សុខ​ទុក​ខ្លះ​ដែរ​តែ​ធ្វើ​ម៉េច​បើ​ខ្ញុំ​អត់​នៅ​ តែ​ទ្វារ​ផ្ទះ​បើក​ចំហរ​ជានិច្ច​ណា!

អាឡូវ​មក​វិញ​ហើយ សង្ឃឹម​ថា​បាន​ជជែក​កំសាន្ដ និង​ទៅ​លេង​ផ្ទះ​បងប្អូន​យើង​ដើម្បី​ញ៉ាំ​ប្រហុក​ ផ្អក​តាម​ផ្ទះ​បងប្អូន​យើង! ប្រហែល​ជា​ទៅ​ផ្ទះ​បង​ស្វា លួច​យក​ប្រហុក​ម៉ា​ក្រឡ​មក​ទុក​កឋិន​ហើយ​មើល​ទៅ! កិកិកិ

ធ្វើ​នំ​អោយ​កូន


កាល​ពី​ថ្ងៃ​សៅ រវល់​សឹង​បែក​ជើង​ហើយ ព្រោះ​ជា​ថ្ងៃ​ដែល​ធ្វើ​ខួប​អោយ​កូន​គំរប់​អាយុ​ម៉ាឆ្នាំ​គត់! កិកិកិ ធ្មេច​បើ​ៗ កូន​ធំ​ហើយ គិត​ទៅ​ពេល​វេលា​រត់​លឿន​មែន​ទែន។ តែ​បន្តិច​ទៀត នឹង​ត្រូវ​ដើរ រត់ ទៅ​រៀន ! វ៉ូវ! ច្រើន​ណាស់! តែ​ចង់​យាយ​តិច​ដែរ! ហើយ​ក៏​មិន​អួត​ទេ ព្រោះ​អី ​អ្វី​ដែល​ចេះគឺ​យក​មក​ប្រើ​ការ​ទាំង​អស់! នំទាំង​នេះ ធ្វើ​ដោយ​ខ្លួ​ន​ឯង​ទេ!

ហេតុ​អ្វី​ត្រូវ​វេច​នំ​អន្សម?


នំ​អន្សម​ជ្រូក អន្សម​ចេក នំ​គោម នំបត់ នំជៀល ត្រូវ​បាន​ធ្វើ​ឡើង​យ៉ាង​ឱឡារឹក​នៅ​ក្នុង​ពិធី​បុណ្យ​ភ្ជុំ​បិណ្ឌ! ប្រជា​ជន​កម្ពុជា​សឹង​តែ​គ្រប់ៗ​គ្នា​ បាន​វេច​នំ​ទាំង​នោះ សំរាប់​ថ្ងៃ​ភ្ជុំ​បិណ្ឌ ជា​ពិសេស​គឺ​៣​ថ្ងៃ​មុន​បិណ្ឌ​ធំ។ មិន​ដឹង​ជា​ប្រវត្តិ​នៃ​ការ​ធ្វើ​នំ​នោះ​យ៉ាង​ណា​ទេ ហើយ​ហេតុ អ្វី​ត្រូវ​វេច​នំ អន្សមទាំង​នោះ​ទៅ​វិញ ម៉េច​ក៏​មិន​ប្រើ​នំ​អ្វី​ផ្សេង​មក​ជំនួស​វិញ​ទៅ? បើ​មាន​បងប្អូន​ណា​ ដឹង​ពី​ប្រវត្តិ​នៃ​ការ​ធ្វើ​នំទាំង​នោះ សូម​ប្រាប់​ផង ហេតុ​អ្វី​មាន​នំ​ច្រើន​ម្លេះ នៅ​ថ្ងៃ​នោះ តើ​ចាំ​បាច់​អ្វី​ត្រូវ​វេច​ នំ​អន្សម​ជ្រូក នំអន្សម​ចេក នំ​គោម នំបត់ នំជៀល?​ ហើយ​នំ​ទាំង​នោះ​តំណាង​អ្វី​ដែរ?

សុំ​រិះ​គន់ បារខេម​២០១០


អ្ហែម! ង៉ៃ​នេះ​សុំ​រិះ​គន់​បារ​ខេម ដើម្បី​ស្ថាបនា ទៅ​ថ្ងៃ​ខាង​មុខ! តែ​មុន​រិះ​គន់ សូមយាយ​តិច​សិន​ដែរ! ញ៉ុម​បាន​ចុះ​ឈ្មោះ អន​ឡាញ ហើយ​សប្បាយ​ចិត្ត​នឹង​បាន​ទៅ សេចក្ដី​រំពឹង​នឹង​បាន​ជួប​មុខ​បងប្អូន​ក្នុង​ភូមិ​វ៉ើត​ប្រេស ព្រោះ​តោង​ដឹង​ថា បើ​មាន​កម្ម​វិធី​អាយធី​ផ្សេងៗ ជៀស​មិន​ផុត​ពី​ដៃ  និង​ក្រសែរ​ភ្នែក​របស់​បងប្អូន​ភូមិ​យើង​ទេ!

អូឃេ នេះ​ជា​អ្វី​ដែល​ខ្ញុំ​មើល​ឃើញ៖

  1. ពេល​ចូល​ទៅ​ដល់​បរិវេណ​សាលា ជា​កន្លែង​រៀប​ចំ​ហ្នឹង ពេល​ផ្ញើរ​ម៉ូតូ​ហើយ អត់​មាន​អ្នក​មក​នែនាំ​ផ្លូវ (host) អ្នក​ខ្លះ​មិន​ដែល​មក​សាលា​ហ្នឹង​ផង​ ចេះ​តែ ទៅ​តាម​គេ​ទៅរក​កន្លែង​ទៅ ដូច​ជា​ញ៉ុម​ជាដើម កិកិកិ
  2. ប្រើ​ប្រពន្ធ័​ចុះ​ឈ្មោះ អនឡាញ តែ​មិន​យក​មក​ប្រើ ព្រោះ​គ្រាន់​តែ​ចង់​បាន​ស្ថិតិលើ​អន​ឡាញ​ប៉ុណ្ណោះ
  3. ចុះឈ្មោះ​លើ​អន​ឡាញ ដាក់​ថា​ប្រើ​ពាក់​អាវ​យឺត​ទំហំ​អី? ញ៉ុម​ដាក់​ទំ​ហំ​ហើយ ដល់​ទៅ​បាន យ់ាប់​ហ្មង​ ដូច​ខ្ចី​អាវ​គេ​មក​ពាក់!
  4. ជា​បារខេម ទាក់​ទង​នឹង​ប្រពន្ធ័​បច្ចេក​វិទ្យា តែ​មិន​បាន​យក​ប្រពន្ធ័​បច្ចេក​វិទ្យា​មក​ប្រើ​ទេ
  5. ចូល​ទៅ​ដល់​កន្លែងប្រជុំ​ចាប់​ផ្ដើម អាងឹត​បន្តិច
  6. អត់មាន​កង្ហារដាក់ ញ៉ុម​បែក​ញ់ស ចង់ក្លាយ​ជា​ស្ទឹង​ហើយ
  7. មើល​មុខ​គណះកម្មការ​មិន​ឃើញ ព្រោះ​ញ៉ុម​គុយ​ឆ្ងាយ​ពេក
  8. ពិធី​ករ និយាយ​អាក់អ៊ួល ដូច​មិន​សូវ​ដឹង​ព័ត៌មាន​ច្បាស់។ ពិធី​ករ​និយាយ​ភាសារអង់​គ្លេស​មិន​សូវ​ល្អ លក់​មុខ​ណាស់​ញ៉ុម! និយាយ​អត់​សូវ​មាន​ protocol គឺ​មិន​ចេះ​ក្នុង​ការ​និយាយ​ជា​ពិធីករ ក្នុង​ចំណោម​មនុស្ស​រាប់​រយ​នាក់ ស្រែក​គំហកៗ ដាច់​ៗ អត់​ទន់​ភ្លន់។
  9. អត់​មាន​ផែន​ទី​សំរាប់​បង្ហាញ​ផ្លូវ​ពី​ទី​កន្លែង​ដែល​នឹង​ត្រូវ​ធ្វើ​បទ​បង្ហាញ​របស់​ក្រុម​ផ្សេងៗ
  10. កន្លែង​តាំង​បង្ហាញ សំរាប់​ក្រុម​ហ៊ុន​ផ្សេងៗ និង​ក្រុម​ផ្សេងៗ​តូច​ចង្អៀត បរិយាកាស​មិន​ល្អ ស្អុះ​ស្អាប់
  11. អត់​មាន​បណ្ដាញ​ភ្លើង​សំរាប់​អ្នក​ប្រើ​ប្រាស់ ឬ​យក​លេបថប់​មក​ជាមួយ! អត់​បាន​ប្រាប់​មុន​ទេ ថា​ត្រូវ​យក​ព្រី​មក​ផង!
  12. អ្វី​ដែល​ធ្វើ​អោយ​ញ៉ុម​សើច​ជាង​គេ គឺ​នៅ​ បារ​ខេម មាន​គេ​លក់​ពងមាន់! កិកិកិ
  13. មិន​ទាន់​រក​នឹក​ឃើញ​រ៉េ

ញ៉ុម​ក៏​បាន​ជួប​ជាមួយ​នឹង​ វណ្ណះ នៅ​ខ្មែរ​អូអេស ហើយ​និយាយ​ពី​ចំណុច​ខាង​លើ​នោះ​ខ្លះ​ដែរ ហើយ​គាត់​ក៏​បាន​ប្រាប់​ដែរ​ថា ដោយ​សារ​តែ​ការ​ឧបត្ថម្ភ​ដល់​កម្ម​វិធី​ មិន​មាន​គ្រប់​គ្រាន់ ចឹង​បើ​សាលា​គេ​អនុញ្ញាតិ​អោយ​ប្រើ​ហើយ ប្រើ​អាគារ​ហ្នឹង​សិន​រូវ!

ក៏​មាន​ចំណុច​ល្អ​ដែល​ញ៉ុម​បាន​ជួប​ប្រទះ

  1. បាន​ជួប​មិត្ត​ថ្មី​ៗ ជា​ពិសេស​មិត្ត​ភូមិ​វ៉ើត​ប្រេស​ហ្នឹង​ម៉ង!
  2. បាន​នំ​ញ៉ាំ និង​ទឹក​មួយ​ដប
  3. អាវ​យឺត​ហ្វ្រី​មួយ
  4. ទទួល​បទ​ពិសោធន៍​ថ្មីៗ តាម​វគ្គ​បង្ហាញ (តែ​ញ៉ុម​អត់​នៅ​ផង)
  5. ផ្ដល់​ឱកាស​ដល់​យុវជន ស្មគ្រ័​ចិត្ត​ជួយ​ចូល​រួម
  6. នឹក​មិន​ទាន់​ឃើញ

ចឹង​ទាំង​នោះគឺ​ជា​អ្វី​ដេល​ញ៉ុម​មើល​ឃើញ​ទេ បើ​គួរ​ពុំ​គួរ កុំ​ប្រកាន់​អី!

ការ​ឈឺចាប់​ដោយ​គ្មាន​ព្រំដែន


វា​មិន​មែន​ជា​ចំរៀង​មួយ​បទ​ ដែល​គេ​និពន្ធ​ឡើង​ ដើម្បី​ច្រៀង​កំដរ​អារម្មណ៍​ដល់​ប្រជា​ជន​នៅ​ទូ​ទាំង​​សកល​លោក​នោះ​ទេ។ ហើយ​វា​ក៏​មិន​មែន​ជា​កំណាព្យ​មួយ​ដែល​​តែង​ឡើង​ដើម្បី​សំសាន្ដ​ចិត្ត​ ធ្វើ​និយាយ​ពី​ការ​ឈឺ​ចាប់​នៅ​ពេល​ដែល​បាត់​បង់នរណា​ម្នាក់​នោះ​ឡើយ ឬពើ​ប​ប្រទះ​នូវ​ហេតុ​ការណ៍​ក្នុង​ជីវិត របស់​បុគ្គល​ម្នាក់ៗ​នោះ​ឡើយ! តើ​វា​គឺ​ជា​អ្វី​ទៅ?

វា​ជា​ផ្ទាំង​គំនូរ​ដែល​បាន​បរិយាយ​ពី​ភាព​ពិត​ដែល​កើត​ឡើង​នៅ​ក្នុង​ប្រទេស​នី​មួយៗ ខ្ញុំ​បាន​ពើប​ប្រទះ​រូប​នេះ​នៅ​ក្នុង​រូប​ Profile ហ្វេស​ប៊ុក របស់​មិត្ត​ខ្ញុំ​ម្នាក់ ហើយ​រូប​នោះ​​វា​បាន​ទាក់​ទាញ​នូវ​ចំណាប់​អារម្មណ៍​របស់​ខ្ញុំ បន្ទាប់​មក​ខ្ញុំ​ក៏​បាន​ស្រាវ​ជ្រាវ​រក​រូប​បន្ថែម​ទៀត៖

អ្វី​ដែល​បាន​កើត​ឡើង​នៅ​ក្នុង​ទ្វីប​អាព្រិក គឺ​ជន​ជាតិ​ឯង​សំលាប់​គ្នា​ឯង!

នៅ​ឥណ្ឌូនេស៊ិ ពេញ​ទៅ​ដោយ​ទឹក​ជំនន់ និង​ព្យុះ ស៊ូណាមិ

ចុះ​រូប​ចុង​ក្រោយ​នេះ​វិញ? ជា​អ្វី​ដែល​នៅ​តែ​បន្ត​កើត​មាន​ឡើង​ដល់​ប្រទេស​កម្ពុជា​មែន​ទេ?

ចង់​ទៅ​មើលនៅ​ក្នុង​វែប​សាយផ្ទាល់ ចុច​ទី​នេះ

ចង់​ញ៉ាំ​នំ​លោក​ខែ


រដូច​ភ្ជុំ​ជិត​ចូល​មក​ដល់​ហើយ បន្ទាប់​ពី​បុណ្យ​ប្រពៃ​ណី​របស់​បងប្អូន​ជន​ជាតិ​ចិន​គឺ សំពះ​លោក​ខែ​ហើយ គឺ​ដល់​រដូវ​ភ្ជុំ​របស់​ខ្មែរ​យើង​ហើយ។ តែក្នុង​រដូវ​ដែល​បងប្អូន​ជន​ជាតិ​ចិន និងកាត់​ចិន​នាំ​គ្នា​ធ្វើ​ពិធី​សំពះ​លោក​ខែ​របស់​គាត់ គឺ​គាត់​មាន​នំញ៉ាំ​លោក​ខែ​ញ៉ាំ។

ឱលោក​អ្នក​ដែល​មាន​នំ​ញ៉ាំ​អើយ​ សូម​ចែក​រំលែក​ខ្លះ​មក! ញ៉ុម​អត់​កាត់​ខ្សែ​ចិន​ អី​រ៉េ តែ ចង់​ញ៉ាំ នំ​ហ្នឹង​ដែរ។ បើ​មាន​សល់​ច្រើន កិកិកិ សុំ​ញ៉ា​ដែរ​មក។ ង៉ៃ​ហ្នឹង​ដូច​ហៀរ​ទឹក​មាត់​ចង់​ញ៉ាំ​នំ​ហ្នឹង​ដូច​អ្នក​ចាញ់​កូន​ម៉េច​ទេ​ញ៉ុម។ ដឹង​ថា​ផ្ទះ​សៀវ​ហេង​មាន​ច្រើន​ណាស់ ប្រហែល​ជា​សៀវ​ហេង​នឹក​ឃើញ ឬ​បើ​បាន​ឃើញ​សេចក្ដី​ប្រកាស​នេះ ក៏​គួរ​តែ​មាន​ចិត្ត​ខ្លះ​ដែរ​តូវ! កុំ​ចិត្ត​អាក្រក់​ពេក

បើ​មាន​បងប្អូន​អ្នក​ភូមិ​ណា​សល់! កិកិកិ ញ៉ុម​ចង់​ញ៉ាំ!! ង៉ៃ​ហ្នឹង​សុំ​តាម​ត្រង់​ហ្មង!