មានប្លុកមួយដែលមិត្តរបស់ខ្ញុំបានរៀបចំឡើងក្នុងគោលបំណងជួយដល់ជនជាតិខ្មែរនៅក្រៅប្រទេស ក្នុងសិក្សាខ្លះៗពីភាសាកំណើតរបស់ខ្លួន ក៏ដូចជាសំរាប់បេសកជននានាដែលមានបំណងចង់មកសិក្សា និងបំរើការនៅក្នុងប្រទេសកម្ពុជា។
សូមចូលទៅកាន់ www.ispeakkhmer.com ហើយចុះឈ្មោះ និង post នូវអត្ថបទជាច្រើនដើម្បីជួយដល់អ្នកដែលស្រឡាញ់ភាសាខ្មែរ។
នៅក្នុងតំណាក់កាលនៃជីវិតរស់នៅរបស់យើងតែងតែជួបប្រទះនូវការផ្លាស់ប្រែជាលំដាប់ ដូចជា កាលនៅពីជាទារក យើងត្រូវទទួលការចិញ្ចឹមបីបាច់ថែរក្សាពីឳពុកម្ដាយ រហូតដល់គ្រប់អាយុក្នុងការចូលរៀន យើងត្រូវឃ្លាតពីឳពុកម្ដាយមួយរយះតូចក្នុងការទៅសិក្សា រហូតដល់ធំពេញវ័យ និងគ្រប់រៀបការ យើងត្រូវទទួលការផ្លាស់ប្រែមួយដ៏ធំទៀតគឺការផ្លាស់ប្រែពីភាពជានៅលីវ ចូលទៅដល់ការមានគ្រួសារ។
ខ្ញុំបានឆ្លងកាត់នូវការផ្លាស់ប្រែទាំងនេះ! មកដល់នឹងពេលនេះ ខ្ញុំនិងភរិយារបស់ខ្ញុំបានរៀបការជាង២ឆ្នាំហើយ ក្នុងរយះពេល២ឆ្នាំជាងកន្លងមកនេះ យើងបានពើបប្រទះនូវរឿងរ៉ាវជាច្រើនក្នុងជីវិតរបស់យើងដែលបង្រៀនយើងពីការរស់នៅរបស់ក្រុមគ្រួសារ២ដែលមានទម្លាប់រស់នៅខុសប្លែកគ្នារហូតដល់បានស៊ាំជាមួយនឹងទម្លាប់ទាំងនេះ។
មកដល់បច្ចុប្បន្ននេះ សីហា មានផ្ទៃពោះនឹងជិតគ្រប់ខែក្នុងខែកញ្ញានេះតែម្ដង។ សូហ្វីយ៉ា ហ្គ្រេស ពិសិដ្ឋ នឹងទៅជាកូនស្រីរបស់យើង ហើយជាមួយកូននេះ ការផ្លាស់ប្រែដ៏ថ្មីមួយទៀតដែលយើងត្រូវត្រៀមខ្លួនទទួលក្នុងការធ្វើជាឳពុកម្ដាយរបស់គេ។ មិនដែលមានសាលាបង្រៀនយើង អោយធ្វើជាឳពុកម្ដាយ និងបង្រៀនយើងពីរបៀបចិញ្ចឹមកូននោះឡើយ! តែយ៉ាងណាមិញ យើងសង្ឃឹមថា យើងនឹងធ្វើជាឳពុកម្ដាយដ៏ល្អសំរាប់កូនស្រីរបស់យើង ជាមួយនឹងការប្រៀនប្រដៅទៅតាមលក្ខណះនៃសេចក្ដីស្រឡាញ់ និងការបង្រៀនអោយដើរតាមមាគ៌ារបស់ព្រះ ជាម្ចាស់។ ព្រះអង្គបានប្រទានកូនស្រីមួយនេះជាអំណោយ និងជាចំណងដៃសំរាប់អាពាហ៍ពិពាហ៍របស់យើង ហើយយើងនឹងទទួលយកនូវព្រះពរនេះសំរាប់ជីវិតរបស់យើង និងស្រឡាញ់កូនស្រីរបស់យើងអោយអស់ពីដួងចិត្ត និងព្យាយាមផ្គត់ផ្គង់គ្រប់បែបយ៉ាង ដើម្បីអោយកូនស្រីនេះ ជាអ្នកដ៏ជាទីស្រឡាញ់សំរាប់អ្នកផងទាំងពួង។
នៅក្នុងលោកយើងនេះ មានរឿងរ៉ាវជាច្រើនដែលកើតមានឡើង ជារៀងរាល់វិនាទី ហើយរឿងរ៉ាវទាំងនោះមិនដូចគ្នាទេ។ អ្នកខ្លះទៅជួបប្រទះនូវរឿងរ៉ាវល្អៗក្នុងជីវិតរបស់គាត់ ហើយអ្នកខ្លះទៀតរឿងរ៉ាវជីវិតហាក់ដូចជាពិបាកសំរាប់គាត់ណាស់ និងមនុស្សមួយចំនួនទៀត រឿងរ៉ាវក្នុងជីវិតរបស់គាត់ ជួនទៅគាប់ប្រសើរ និងជួនកាលទៀតទៅក៏ស្រេចទៅតាមជោកវាសនាទៅ។ អ្នកដែលមានរឿងរ៉ាវក្នុងជីវិតដែលល្អៗ តែងតែរស់នៅពោរពេញដោយស្នាមញញឹម រីឯអ្នកដែលមានរឿងរ៉ាវមិនសូវល្អវិញ ជីវិតហាក់ដូចជាជំងឺមហារីក ដែលរង់ចាំតែថ្ងៃកំណត់មកដល់ រស់គ្មានក្ដីសង្ឃឹម មួយថ្ងៃៗជួបតែទុក្ខលំបាក និងទឹកភ្នែកតែប៉ុណ្ណោះ! តើជីវិតមានតែប៉ុណ្ណឹងទេអី?
នេះគ្រាន់តែជាសំនួរសំរាប់ អ្នកដែលមានជីវិតលំបាក និងគ្រាំគ្រា។ បើនិយាយពីជីវិតដែលលំបាកវិញ វាមានច្រើនប្រភេទ អ្នកខ្លះលំបាកដោយសារតែគាត់មានជំងឺ អ្នកខ្លះទៀតមានវិប្បដិសារីតាមជេរស្ដីដូចជាស្រមោលអន្ទោលតាមប្រាណ អ្នកខ្លះទៀតត្រូវខូចចិត្ត និងគ្រាំគ្រាចិត្ត ក៏មានអ្នកខ្លះទៀតវេទនាដោយសារតែភាពក្រីក្រ!
យើងចង់ចែករំលែកនូវជីវិតដែលរស់ដោយមានសេចក្ដីសង្ឃឹម មានភាពរីករាយ មានសុភមង្គល និងជីវិតដែលមានអនាគត និងការថ្លឺងថ្លែងយ៉ាងច្បាស់នូវអ្វីដែលល្អ និងអាក្រក់។
