ថ្ងៃនេះជាលើកទី១ហើយក្នុងរយះពេលជាង៣ខែកន្លងមកនេះ ដែលខ្ញុំមិនដែលនឹងនាំប្រពន្ធទៅញ៉ាំអាហារពេលព្រឹកនៅខាងក្រៅទេ ព្រោះគ្រប់ពេលយើងរវល់តែរៀងៗខ្លួន ងើបពីគេងរៀបចំខ្លួនអោយកូន ហើយរៀបចំខ្លួនឯង បន្ទាប់មកទៅធ្វើការ។ តែព្រឹកនេះ សុំច្បាប់ចៅហ្វាយក្នុងការទៅធ្វើការយឺតបន្តិច ព្រោះចង់នាំ ប្រពន្ធទៅ Breakfast Dating។ មានអារម្មណ៍ថាមានសេចក្ដីសុខ ដែលយើងបានជជែកគ្នាពីនេះ ពីនោះ នៅក្នុងទំនាក់ទំនងយើងទាំងពីរនាក់ តែចៃដន្យអីមាន ទូរសព្ទ័មករំខាន ហើយខ្ញុំក៏មិនអាចបដិសេធក្នុងការមិនលើកបានដែរ។ មានអារម្មណ៍ថាមានអីមកកាត់ផ្ដាច់មនោសញ្ចេតនារបស់យើងទាំងពីរនាក់ហ្មង! តែយ៉ាងណាក៏បានសុំទោសប្រពន្ធរួចហើយ ថែមទាំងសន្យាថា ថ្ងៃ ក្រោយនឹងមិនអោយមានអ្វីមករារាំងក្នុងការ ទទួលទាន Breakfast Dating របស់យើងបានឡើយ។
Month: ខែមិថុនា 2010
សាច់មាន់ប្រឡាក់ប្រេងខ្យងហិរ
កាលនៅអាមេរិក ក្នុងរដ្ឋ អូក្លាហូម៉ា ខ្ញុំបានធ្វើម្ហូបមួយមុខ ដែលខ្ញុំសាកល្បងទៅ ឆ្ងាញ់ ៗ ៗ ពិតមែន ហើយក៏ចង់អោយ ប្រិយមិត្តសាកល្បងដែរ ដោយប្រើនូវវិធីងាយៗបំផុត។
គ្រឿងផ្សំ
- សាច់មាន់ផ្នែកស្លាប ៥គូរ ស្មើរ១០ស្លាប
- ប្រេងខ្យង៣ស្លាបព្រាបាយ
- ទឹកស៊ីអ៊ីវ១ស្លាបព្រាបាយ
- ស្ករត្នោត១ស្លាបព្រាបាយកន្លះ
- ម្សៅស៊ុបខ្នរ ២ស្លាបព្រាបាយ
- និងម្ទេសបុក ១ស្លាបព្រាបាយ
របៀបធ្វើៈ
គ្រាន់តែប្រឡាក់សាច់មាន់ជាមួយនិងគ្រឿងទាំងនោះ ហើយទុករយះពេលកន្លះម៉ោង រួចហើយប្រើប្រេងសណ្ដែកក្នុងខ្ទះ រួចចៀន ដោយប្រើភ្លើងល្មម មិនខ្លាំងពេក នោះអ្នកនឹងបានរស់ជាតិសាច់មាន់ដែលឆ្ងាញ់ជាទីគាប់ចិត្ត។
ខ្ញុំបានសាករួចហើយ មិត្តរបស់ខ្ញុំជនជាតិបរទេសញ៉ាំទាល់តែលិទ្ធដៃឯណោះ!
រស់មានរឿងអាស្រូវ
ខ្ញុំមិនសូវជាអ្នកចូលចិត្តអានទស្សនាវដ្ដី ឬតាមដានពីជីវិតតារាអីប៉ុន្មានទេ តែចេះតែលឺអ្នកនេះ អ្នកនោះនិយាយអញ្ចេះ អញ្ចោះ ពីតារានេះតារានោះ ដែលរស់នៅក្នុងជីវិតនេះមានរឿងអាស្រូវច្រើន ស្រឡាញ់ប្ដីគេ អ្នកនេះទិញឡានអោយ អ្នកនោះបើកហាងអោយ ហើយប្ដូរសង្សាថ្មីៗ ហើយនឹង….
ខ្ញុំគិតថា មិនមានតារាណាចង់មានរឿងអាស្រូវទេ តែទស្សនិកជនដែលជាអ្នកបំប៉ោងរឿងអោយធំឡើង! នេះខ្ញុំគិតខុសដឹង? មានពាក្យមួយដែលគេនិយាយថា ទាល់តែអ្នកឯងពាក់ស្បែកជើងគេ ទើបបានដឹងថាយ៉ាងម៉េច!
ខ្ញុំនិងគ្រួសារ
ថ្ងៃនេះចង់បង្ហាញពីគ្រួសារ របស់ខ្ញុំតិច ព្រោះអីខាននិយាយយូរហើយ ព្រោះ អីរវល់នោះរវល់ មិនដឹងជាអាម៉េច។
សំរាប់ខ្ញុំនឹងគ្រួសាររបស់ខ្ញុំ យើងមាននិមិត្តមួយដែលពួកយើងចង់រស់នៅដោយមានទំនាក់ទំនងជិតស្និទ្ធគ្នា និងមានភាពផ្អែមល្ហែមចំពោះគ្នាទៅវិញទៅមក។ សំរាប់មិនិត្តរបស់យើងគឺយើងចង់រស់នៅជាគំរូសំរាប់យុវវ័យជំនាន់ក្រោយ ក្នុងផ្នែកគ្រួសារ និងជាឳពុកម្ដាយ។ មិនមានន័យថាយើងនេះល្អឥតខ្ចោះនោះទេ តែសង្គមបច្ចុប្បន្ន និងឆន្ទះនៃជីវិតបានបង្រៀនយើងជារៀងរាល់ថ្ងៃពីគ្រួសារ និងជិវិត។
សព្វថ្ងៃនេះខ្ញុំស្រឡាញ់ប្រពន្ធកូនខ្ញុំច្រើនទៅៗ ទោះបីជាពេលខ្លះមានអារម្មណ៍ថានឿយហត់ និងណាយបន្តិចមែនតែមិនអោយភាពទាំងនោះមកបំបាត់ភាពស្និទ្ធស្នាល និងភាពសប្បាយរីករាយនៅក្នុងក្រុមគ្រួសារយើងឡើយ ព្រោះអីយើងជាគ្រួសារតែមួយ ហើយការរស់នៅត្រូវមានការចុះសម្រុងនិងការយល់ចិត្តគ្នាជាខ្លាំង។ ខ្ញុំពិតជាសប្បាយចិត្តជាខ្លាំងដែលខ្ញុំមានប្រពន្ធដែលទុកចិត្តខ្ញុំ ហើយមិនងាយនឹងប្រចណ្ឌ័តែផ្ដេសតែផ្ដាស ហើយគាត់បានបង្ហាញអោយខ្ញុំដឹងពីចិត្តគំនិតរបស់គាត់ជាច្រើន។ មានពេលខ្លះពិតមែនយើងបានប្រកែកពាក្យសម្ដីគ្នា តែយើងមិនបណ្ដាលអោយការទាស់ទែងពាក្យសម្ដីមកបំបែកបំបាក់នូវទំនាក់ទំនងគ្នាទេ តែវារឹតតែធ្វើអោយយើងយល់ចិត្តគ្នាកាន់តែខ្លាំងឡើងថែមមួយកំរឹតទៀត។ ខ្ញុំត្រូវមានតួនាទីយ៉ាងច្រើនសម្បើម ព្រោះជាមេគ្រួសារ ជាប្ដី និងជាឳពុកសំរាប់កូនស្រីខ្ញុំ។ ការរស់នៅត្រូវមានភាពថ្លៃថ្នូរ និងសមរម្យ មិនប្រព្រឹត្តអ្វីដែលនាំអោយកូនយកគំរូអាក្រក់តាមឡើយ។ តែយ៉ាងណាម៉ិញការប្រៀនប្រដៅសំរាប់កូនគឺត្រូវតែមាន។
ខ្ញុំសារភាពថា ខ្ញុំមិនមែនជាមនុស្សគ្រប់លក្ខណ៍ ឬពូកែរអ្វីទេ ព្រោះខ្ញុំនៅមានចំណុចខ្សោយរបស់ខ្ញុំ និងមានពេលខ្លះក៏ខ្ញុំធុញទ្រាន់ និងមិនចូលចិត្តដែរ។ តែការឆ្លើយតបទៅកាន់ចំណុចខ្សោយនោះដោយរបៀបណា ហើយការប្រឈមមុខនឹងភាពធុនទ្រាន់នោះយ៉ាងម៉េចដែរ ព្រោះការឆ្លើតតបរបស់យើងទៅកាន់កាលះទេសះនីមួយៗពិតជាសំខាន់ ហើយវានឹងកំណត់នូវភាពប្រាកដប្រជានៅក្នុងជីវិតរបស់យើងផងដែរ។
តើអ្នកស្រឡាញ់ក្រុមគ្រួសាររបស់អ្នកប៉ុណ្ណា?
តើបន្ទាប់ពីធ្វើការហើយ អ្នកពិតជាចង់ទៅផ្ទះជួបជុំគ្រួរសារ ឬចង់ចេញដើរកំសាន្ដសំរាប់លំហើយខួរក្បាល?
ខ្ញុំជឿថា មនុស្សយើងមានលក្ខណះខុសៗគ្នា ហើយមិនអាចធ្វើបានដូចគ្នានោះទេ។ វាពិតមែនជួនកាលខ្ញុំមិនអាចធ្វើការទាំងនោះបានទេ តែសូមប្រាប់ថា គ្រួសារខ្ញុំជាអ្នកដែលជឿលើព្រះយេស៊ូគ្រិស្ត ហើយយើងគោរពបំរើ និងស្រឡាញ់ព្រះរបស់យើងខ្លាំងណាស់ ដូច្នេះហើយ ក្រុមគ្រួសារគឺជារឿងសំខាន់សំរាប់យើង និងសំរាប់ព្រះរបស់យើង។ ដ្បិតព្រះរបស់យើងបានបង្រៀនយើងអោយស្រឡាញ់ភរិយា និងគោរពបំរើគ្នាទៅវិញទៅមក ហើយនិងក្រុមគ្រួសាររបស់យើងផងដែរ។ ខ្ញុំសប្បាយចិត្តនឹងធ្វើកិច្ចការទាំងនោះ ដោយមានព្រះជាម្ចាស់របស់ខ្ញុំនៅជាមួយខ្ញុំ ហើយព្រះបន្ទូលរបស់ព្រះអង្គដាស់តឿនចិត្តគំនិត និងលើកទឹកចិត្តខ្ញុំគ្រប់ពេលវេលា។
មានតារាប៉ុន្មាននៅក្នុងភូមិវ៉ើតប្រេស?
ចង់ដឹងថាតើមានតារាចំរៀង តារាភាពយន្តប៉ុន្មាននាក់ដែលមានប្លកនៅក្នុងនេះ ព្រោះមិនដឹងថា តើតារាទាំងនោះនឹងមានពេលវេលា ឬក៏មានចំណេះដឹងខាងផ្នែកអាយធី ឬចេះរៀបចំប្លកអត់ទេ? ប្រសិនបើអ្នកភូមិដឹងជួយប្រាប់ផង?
ជីវិត និង គ្រួសារ 