លេង​ម៉ូដ​សក់!


គិត​ទៅ​ការ​ដែល​មាន​សក់​វែង យើង​អាច​លេង​ម៉ូដ​បាន​តាម​ចិត្ត ហើយ​មិន​បាច់​ខ្វល់​ពី​អ្វី​ឡើយ។ ថ្មីៗ​នេះ​ខ្ញុំ​បាន​សាក​ល្បង​ដូរ​ម៉ូដ​សក់​របស់​ខ្ញុំ​ម្ដង។ ដូច​ជា​អ្នក​ដែល​បាន​ធ្លាប់​ស្គាល់​ខ្ញុំពី​មុន​មក ខ្ញុំ​មាន​សក់​រួញ ហើយ​បើ​ទុក​ខ្លី​វានឹង​រួញ​ជាប់​គ្នា​មើល​ទៅ​មិន​ល្អ​មើល​សោះ! បើ​កាត់​វិញ​ ត្រូវ​កាត់​អោយ​ខ្លី គឺ​ប្រើ​ត្រង់ដឺ​លេខ​៣។ បើ​ទុក​វិញ​ត្រូវ​ទុក​វែង​អី​ចឹង​ហ្នែ៎! ទុក​វែង​ទៅ​វា​ចេះ​តែ​រួញ បើ​អី​ចឹង​ក៏​លេង​ម៉ូដ​បន្តិច​គឺ​ប្រើ ជែល​សំរាប់​សក់​ពេល​ងូត​ទឹក​រួច និង​សសុស​វា​អោយ​មាន​លក្ខណះ​រួញ​តាម​របៀប មើល​ទៅ​ដូច​សក់​អ៊ុត​អី​ចឹង។

Shotមក​ដល់​ពេល​នេះ​ខ្ញុំ​សាក​ក្រង​តាម​ជន​ជាតិ​អាហ្វ្រិក​វិញ គឺ​ក្រង​ជាប់​នឹង​ស្បែក​ក្បាល មាន​អី​មើល​ទៅ​កាលីប​ម្យ៉ាង​ដែរ​តើ! វា​ក៏​សម​នឹង​ទម្រង់​មុខ​របស់​ខ្ញុំ​ដែរ។ ក្រង​បាន​២​ថ្ងៃ មាន​មនុស្ស​ជា​ច្រើន​បាន​ឃើញ​ខ្ញុំ​ ហើយ​ខ្លះ​គេ​និយាយ​ថា កាលីប និង​លូយ​ផស់​គេ​មែន អ្នក​ខ្លះ​ទៀត​ពេប​មាត់​មិន​ចូល​ចិត្ត ហើយ​អ្នក​ខ្លះ​ទៀត​ក៏​សើច​អោយ​ខ្ញុំ តែ​យ៉ាង​ណា​ម៉ិញ អោយ​តែ​ប្រពន្ធ​ខ្ញុំ​ថា​មិន​អី អាហ្នឹង​វា​រួច​ទៅ​ហើយ! យ៉ាង​ណា​ម៉ិញ​ប្រពន្ធ​ខ្ញុំ​ជា​អ្នក​ដែល​ជំរុញ​អោយ​ខ្ញុំ​សាក​ល្បង​ក្រង​បែប​នេះ លុះ​ក្រង​រួច​ហើយ​គាត់​ក៏​សរសើរ​ដែរ​ថា​វា​សម​នឹង​មុខ​ខ្ញុំ​ គាត់​ចង់​អោយ​ខ្ញុំ​ទុក​វា​អោយ​បាន​មួយ​សប្ដាហ៍។

បើ​និយាយ​ពី​ផល​វិបាក​វិញ ពិ​បាក​នឹង​គេង​បន្តិច ព្រោះ​មិន​ទាន់​ស៊ាំ និង​ទើសៗ​ម៉េច​មិនដឹង​ទេ! ពិ​បាក​ថែរ​ក្សា​បន្តិច ព្រោះ​ពេល​រមាស់​ក្បាល​ម្ដងៗ ធ្លាប់​តែ​ក្រញាំ​ទាំង​៥​អេះ​យ៎ៗ តែ​ពេល​នេះ​ត្រូវ​ប្រើ​តែ​ម្រាម​មួយ​អេះ​កន្លែង​ដែលរម៉ាស់! មួយ​ទៀត​គឺ​ពិ​បាក​កក់​សក់ ព្រោះ​បើ​ទុក​មួយ​អាទិត្យ​​ដោយ​មិន​បាន​កក់​សក់ ល្អ​ដែរ​ដែល​ខ្ញុំ​បាន​កក់​សក់​មុន​ពេល​ទៅ​ក្រង​ កុំ​អី​យ៉ាប់​ហ្មង! ចុង​ក្រោយ​គឺ​ពេល​ដោះ​សក់​វិញ​ ខ្ញុំ​គិត​ថា​នឹង​ឈឺ​ហើយ​មើល​ទៅ!

យ៉ាង​ណា​ម៉ិញ​វា​ក៏​ជា​បទ​ពិ​សោធន៍​មួយ​​សំរាប់​ឆ្នាំ​នេះ​ដែរ។!

Advertisements

បទ​ចម្រៀង​ខ្មែរ​ខ្លីៗ និង​អាហ្គរ័


សំរាប់​អស់​អ្នក​ដែល​ចង់​បាន​បទ​ចំរៀង​ខ្មែរ​ពី​ដើមៗ ខ្លីៗ និង​អាហ្គរ័ សូម​ប្រាប់​អ៊ី​ម៉ែល ខ្ញុំ​នឹង​ផ្ញើរ​ទៅ​ជូន​ទាំង​ថាស​តែ​ម្ដង។ សូម​អ៊ី​ម៉ែល​មក​កាន់​ខ្ញុំ pisit@nlfcambodia.org ​ប្រសិន​បើ​ចង់​មាន ព្រោះ​ខ្ញុំ​មិន​សូវ​ពូ​កែ​ខាង​ IT និង​មិន​ទាន់​ចេះ​ដាក់​អោយ​ ដោន​ឡូដ​ទេ!

សំរាប់​អ្នក​ចង់​ជួយ​ដល់​អ្នក​ដែល​រៀន​ភាសា​ខ្មែរ


មាន​ប្លុក​មួយ​ដែល​មិត្ត​របស់​ខ្ញុំ​បាន​រៀប​ចំ​ឡើង​ក្នុង​គោល​បំណង​ជួយ​ដល់​ជន​ជាតិ​ខ្មែរ​នៅ​ក្រៅ​ប្រទេស​ ក្នុង​សិក្សា​ខ្លះ​ៗ​ពី​ភាសា​កំណើត​របស់​ខ្លួន ក៏​ដូច​ជា​សំរាប់​បេសកជន​នានា​ដែល​មាន​បំណង​ចង់​មក​សិក្សា និង​បំរើ​ការ​នៅ​ក្នុង​ប្រទេស​កម្ពុជា។

សូម​ចូល​ទៅ​កាន់ www.ispeakkhmer.com ហើយ​ចុះ​ឈ្មោះ និង​ post នូវ​អត្ថ​បទ​ជា​ច្រើន​ដើម្បី​ជួយ​ដល់​អ្នក​ដែល​ស្រឡាញ់​​ភាសា​ខ្មែរ។

រាត្រី​ទី​១សំរាប់​ខ្ញុំ


នេះ​មិនជា​បទ​ចំរៀង​របស់​អ្នក​ចម្រៀង​មួយរូប ដែល​គាត់​បាន​ច្រៀង​រៀប​រាប់​ប្រាប់​ដល់​ស្រុក​ខ្មែរ និង​ប្រជា​ជន​ខ្មែរ​ទាំង​មូល​ថា រាត្រី​ទី​១សំរាប់​ខ្ញុំ។ រាត្រី​ទី១សំរាប់​ខ្ញុំ​គឺ​ជា​ក្ដី​រំភើប​មួយ​ដ៏​ឥត​ឧបមារ ព្រោះ​ជា​អ្វី​មួយ​ដែល​ខ្ញុំ​បាន​ទន្ទឹង​រង់​ចាំ​អស់​រយះពេល​ជា​ច្រើន​ខែ​កន្លង​មក​ហើយ! វា​ជា​ត្រី​មួយ​ដែល​ខ្ញុំ​​បាន​បំពេញ​កាតព្វ​កិច្ច​របស់​ខ្ញុំ​។

 

អាន​ទៅ​ប្រាកដ​ជា​ឆ្ងល់​ហើយ​ថា តើ​ខ្ញុំ​ចង់​និយាយ​ពី​អ្វី? គឺ​ខ្ញុំ​ចង់​និយាយ​ពី​រឿង​កូន​របស់​ខ្ញុំ​ហ្នឹង​ណា៎! ឥឡូវ​នេះ​ខ្ញុំ​ក្លាយ​ជា​ឳពុក​របស់​គេ​ហើយ! វា​ជា​អំណោយ​មួយ​ដ៏​វិសេស​វិសាល​សំរាប់​រូប​ខ្ញុំ ព្រោះ​ខ្ញុំ​យល់​ថា កូន​ចៅ​គឺ​ជា​ផល​ផ្លែ​សំរាប់​អាពាហ៍​ពិពាហ៍។ កូន​ស្រី​របស់​ខ្ញុំ សូហ្វីយ៉ា កើត​នា​ថ្ងៃ​ទី​១ ខែ​តុលា ឆ្នាំ​២០០៩ វេលា​ម៉ោង ៥៖៣៥នាទីល្ងាច មាន​ទំងន់ ៣.៥គឡ, ប្រវែង ៥០សម និង​មាន​សក់​ត្រង់ មិន​កាត់​មក​ខ្ញុំ​ដែល​មាន​សក់​រួញ​សោះ! នៅ​សម្ភព​សោភា វីអាយ​ភី (សុំបើក​រង្វង់​ក្រចក​នែនាំ​មន្ទី​រ​សម្ភព​នេះ​បន្តិច​ចុះ) ប្រសិន​បើ​អ្នក​មាន​ប្រពន្ធ ឬ​បងប្អូន​ស្រី​ដែល​ត្រូវ​សំរាល​កូន ខ្ញុំ​សូម​នែនាំ​មក​កាន់​សម្ភព​នេះ! មិន​ថា​ទេ​​រឿង​សេវាកម្ម គឺ​ល្អ បន្ទប់​ដូច​ជា​សណ្ឋាគារ​ផ្កាយ​៤ មាន​បំរើ​អាហារ បោក​គក់ គ្រប់​គ្រូពេទ្យវេជ្ជបណ្ឌិត ឆ្មប និង​គលានុបដ្ឋយិការ សុទ្ធ​តែ​មាន​សំដឺ​ទន់​ភ្លន់ និង​យក​ចិត្ត​ទុក​ដាក់​ខ្ពស់។ មាន​កញ្ចប់​តម្លៃ​៣ប្រភេទ​គឺ $450, $500, និង $800។ ខ្ញុំ​នឹង​ប្រពន្ធ​របស់​ខ្ញុំ​សំរាល​កូន​នៅ​ទី​នោះ មាន​អារម្មណ៍​ថា ក្រៅ​ពី​សំរាល​កូន​ ដូច​ជា​ខ្លួន​កំពុង​តែសំរាក​ហូលីដេអីចឹង!

 Sophia Sleeping 2យប់​តំបូង​កូន​ស្រី​របស់​ខ្ញុំ​គេង​នៅ​ក្បែរ​ខ្ញុំ ព្រោះ​ម្ដាយ​របស់គេ​សំរាក​នៅ​លើ​គ្រែ។ សំរាប់​ខ្ញុំ​នោះ​គឺ​ជា​រាត្រី​មួយ​ដែល​ខ្ញុំ​នឹក​ចាំ​មិន​ភ្លេច​សោះ​ឡើយ! ខ្ញុំ​គេង​មិន​បាន​ស្កប់​ទាល់​តែ​សោះ ព្រោះ​ណា​មួយ​ដួង​ចិត្ត​រំភើប​ដែល​បាន​កូន​កើត​មក​មាន​សុខភាពល្អ និង​ស្រស់​ស្អាត ណា​មួយ​ទៀត​បាន​ក្លាយ​ខ្លួន​ជា​​ឪពុក​របស់​គេ និង​ណា​មួយ​ទៀត​ខ្លាច​កើត​មាន​រឿង​រ៉ាវ​មិន​ល្អ​ចំពោះ​គាត់។ រាត្រី​នោះ​ខ្ញុំ​ចាប់​ផ្ដើម​នូវ​ជីវិត​ថ្មី​ដែល​ជីវិត​នោះ មិន​ត្រឹម​តែ​មាន​ប្រពន្ធ តែ​ថែម​ទាំង​មាន​កូន​ទៀត វានឹង​ធ្វើ​អោយ​ខ្ញុំ​រឹត​តែ​រវល់​ច្រើន តែ​យ៉ាង​ណា​ម៉ិញ ខ្ញុំ​នឹង​ប្ដេជ្ញា​ចិត្ត​ក្នុង​ការ​ធ្វើ​ជា​ប្ដី​ដ៏ល្អ​សំរាប់​ប្រពន្ធ​របស់​ខ្ញុំ និង​ជាឳពុក​ដ៏ល្អ​​សំរាប់​កូន​ស្រី​របស់​ខ្ញុំ។ គោល​បំណង​សំខាន់​សំរាប់​ជីវិត​របស់​ខ្ញុំ​គឺ ក្រុម​គ្រួសារ​របស់​ខ្ញុំ​នឹង​ក្លាយ​ជា​គ្រួ​សារគំរូ​សំរាប់​អ្នក​ដែល​នៅ​ជុំ​វិញ​ខ្លួន​របស់​ខ្ញុំ។ ពេញ​មួយ​យប់​ខ្ញុំ​គេង​ភ្ញាក់ៗ ចេះ​តែ​សម្លឹង​មើល​មុខ​កូន ហើយ​ក្នុង​ចិត្ត​វិញ​នឹក​ហួស​ចិត្ត និង​ស្មាន​មិន​ដល់​ថា​នឹង​ក្លាយ​ជា​ឳពុក​គេ​បែប​នេះ​សោះ តែ​ឥឡូវ​​បាន​ក្លាយ​ជា​ការ​ពិត​ហើយ អ្វី​ដែល​រសាប់​រសល់​ពី​មុន ក៏​លែង​រសាប់​រសល់​ទៀត​ដែរ!

 រាត្រី​ទី​១​បាន​កន្លង​ផុត​ទៅ​យ៉ាង​រលូន ដោយ​កូន​របស់​ខ្ញុំ​មិន​យំ​ទាល់​តែ​សោះ! ចំ​ជា​ពូកែរ​មែន! សូម​រង់​ចាំ​អាន​រាត្រី​ទី២…